ເສດຖະກິດລາວຟື້ນຕົວ ແຕ່ສິ່ງທ້າທາຍຍັງຄົງມີ: ທະນາຄານໂລກ

ເສດຖະກິດລາວ ກຳລັງຟື້ນຕົວເທື່ອລະກ້າວຈາກການລະບາດຂອງໂຄວິດ-19 ໂດຍຄາດວ່າ GDP ຈະເຕີບໂຕ 3.7 ເປີເຊັນໃນປີນີ້ ເພີ່ມຂຶ້ນຈາກ 2.7 ເປີເຊັນໃນປີ 2022 ອີງຕາມບົດລາຍງານເສດຖະກິດສະບັບລ່າສຸດຂອງທະນາຄານໂລກ ທີ່ອອກໃນວັນພະຫັດ.

ທະນາຄານໂລກຄາດຄະເນວ່າ ເສດຖະກິດລາວຈະເຕີບໂຕ 4.1 ເປີເຊັນໃນປີ 2024. –ພາບ: Katai Thatdam

ບົດລາຍງານທີ່ມີຫົວຂໍ້ວ່າ ນະໂຍບາຍການຄັງເພື່ອສະຖຽນລະພາບ ຄາດຄະເນວ່າເສດຖະກິດລາວຈະເຕີບໂຕ 4.1 ເປີເຊັນໃນປີ 2024 ແຕ່ຍັງຈະມີສິ່ງທ້າທາຍ ຍ້ອນອັດຕາເງິນເຟີ້ທີ່ສູງຂຶ້ນຢ່າງໄວວາ, ໜີ້ຕ່າງປະເທດສູງ ແລະ ການຂາດແຄນແຮງງານ.
ທະນາຄານໂລກລະບຸວ່າ ເສດຖະກິດທີ່ດີຂຶ້ນ ສ່ວນໃຫຍ່ມາຈາກການທ່ອງທ່ຽວ, ການບໍລິການຂົນສົ່ງ ແລະ ໂລຈິສຕິກທີ່ດີຂຶ້ນ ແລະ ການລົງທຶນຈາກຕ່າງປະເທດທີ່ເພີ່ມຂຶ້ນ ແຕ່ອັດຕາການເຕີບໂຕຍັງຕ່ຳກວ່າທີ່ຄາດໄວ້ກ່ອນໜ້ານີ້.
ບົດລາຍງານສະແດງໃຫ້ເຫັນວ່າ ອັດຕາເງິນເຟີ້ໄດ້ເພີ່ມຄ່າໃຊ້ຈ່າຍໃນການບໍລິໂພກ ແລະ ທຸລະກິດ ເຮັດໃຫ້ຄົວເຮືອນໃຊ້ຈ່າຍດ້ານອາຫານ, ການສຶກສາ ແລະ ສຸຂະພາບໜ້ອຍລົງ. ເງິນເຟີ້ຍັງເຮັດໃຫ້ເງິນອອມຫຼຸດລົງ ສ່ຽງຕໍ່ການທີ່ຫຼາຍຄອບຄົວຈະຕົກຢູ່ໃນຄວາມທຸກຍາກ.
“ເຖິງວ່າລາຄາສິນຄ້ານຳເຂົ້າບາງຢ່າງໃນຕະຫຼາດໂລກຈະຫຼຸດລົງແລ້ວ ແຕ່ອັດຕາເງິນເຟີ້ໃນລາວຍັງສູງ ເຖິງ 26 ເປີເຊັນ ໃນຮອບປີເຖິງເດືອນຕຸລາ 2023. ເງິນເຟີ້ດ້ານລາຄາອາຫານຢູ່ທີ່ 29 ເປີເຊັນ ສົ່ງຜົນກະທົບຢ່າງໜັກຕໍ່ຄົວເຮືອນທຸກຍາກໃນຕົວເມືອງ,” ທະນາຄານໂລກກ່າວ.

“ຄ່າເງິນກີບທີ່ອ່ອນຄ່າລົງ ແມ່ນສາເຫດຫຼັກ – ໂດຍສະເລ່ຍ ເມື່ອເງິນກີບອ່ອນຄ່າລົງ 1 ເປີເຊັນ ລາຄາຜູ້ບໍລິໂພກຈະເພີ່ມຂຶ້ນ 0.5 ເປີເຊັນ. ສະນັ້ນ ອັດຕາເງິນເຟີ້ຈະຍັງສູງ ຈົນກວ່າອັດຕາແລກປ່ຽນຈະໝັ້ນຄົງ.”

ເງິນກີບສືບຕໍ່ອ່ອນຄ່າລົງຕະຫຼອດປີ 2023 ໂດຍອ່ອນຄ່າລົງ 29 ເປີເຊັນ ທຽບກັບເງິນບາດ ແລະ 21 ເປີເຊັນ ທຽບກັບເງິນໂດລາສະຫະລັດ ເຖິງເດືອນຕຸລາ. ຄວາມບໍ່ສົມດຸນລະຫວ່າງຄວາມຕ້ອງການ ແລະ ການສະໜອງເງິນຕາຕ່າງປະເທດ ແລະ ລາຍຮັບຈາກການສົ່ງອອກທີ່ໄຫຼເຂົ້າມາໜ້ອຍ ໄດ້ສົ່ງຜົນກະທົບຕໍ່ເສດຖະກິດລາວ.

ທ່ານ Alex Kremer ຜູ້ຈັດການປະຈຳປະເທດລາວ ຂອງທະນາຄານໂລກ ກ່າວວ່າ: “ການເກັບອາກອນທີ່ຕ່ຳ ກຳລັງບັ່ນທອນສະຖຽນລະພາບທາງເສດຖະກິດ ແລະ ທ່າແຮງການພັດທະນາຂອງລາວ. ເພື່ອຟື້ນຟູສະຖຽນລະພາບທາງເສດຖະກິດ ສິ່ງສຳຄັນແມ່ນຕ້ອງປັບອາກອນມູນຄ່າເພີ່ມກັບຄືນເປັນ 10 ເປີເຊັນ, ປັບໂຄງສ້າງອາກອນຢາສູບ ແລະ ເຫຼົ້າ ແລະ ເພີ່ມລາຍຮັບ ເພື່ອປົກປ້ອງລາຍຈ່າຍດ້ານສາທາລະນະສຸກ ແລະ ການສຶກສາ.”

ລັດຖະບານໄດ້ດຳເນີນຫຼາຍມາດຕະການ ເພື່ອປັບປຸງການເງິນ ໂດຍຄວບຄຸມລາຍຈ່າຍ ແລະ ເພີ່ມລາຍຮັບພາຍໃນ ໃນເຄິ່ງປີທຳອິດຂອງປີ 2023. ເຖິງຢ່າງໃດກໍຕາມ ເຖິງແມ່ນລັດຖະບານຈະມີລາຍຮັບຫຼາຍກວ່າລາຍຈ່າຍໃນເຄິ່ງປີທຳອິດຂອງປີ 2023 ແຕ່ພັນທະການຊຳລະໜີ້ທີ່ສູງ ໄດ້ສົ່ງຜົນຕໍ່ລາຍຈ່າຍພາກລັດດ້ານການສຶກສາ ແລະ ສາທາລະນະສຸກ ເຊິ່ງຫຼຸດລົງຈາກ 4.9 ເປີເຊັນຂອງ GDP ໃນປີ 2013 ເຫຼືອປະມານ 2.3 ເປີເຊັນໃນປີ 2023.

ເພື່ອປັບປຸງການເກັບລາຍຮັບ ບົດລາຍງານໄດ້ສະເໜີໃຫ້ຟື້ນຟູອາກອນມູນຄ່າເພີ່ມກັບຄືນສູ່ອັດຕາເດີມ 10 ເປີເຊັນ, ປັບປຸງກົດໝາຍວ່າດ້ວຍການສົ່ງເສີມການລົງທຶນ ເພື່ອຈຳກັດນະໂຍບາຍສົ່ງເສີມ ແລະ ຂະຫຍາຍຖານອາກອນ, ປະຕິຮູບໂຄງສ້າງ ແລະ ອັດຕາອາກອນຊົມໃຊ້ ແລະ ເສີມສ້າງການຄຸ້ມຄອງຜູ້ເສຍອາກອນລາຍໃຫຍ່.

ຄາດວ່າການເຕີບໂຕທາງເສດຖະກິດ ຈະເລັ່ງຂຶ້ນເປັນສະເລ່ຍ 4.2 ເປີເຊັນໃນໄລຍະກາງ ນຳໂດຍການບໍລິການ ແລະ ການສົ່ງອອກ ພ້ອມໄດ້ຮັບແຮງໜູນຈາກຄວາມຕ້ອງການສາກົນທີ່ເພີ່ມຂຶ້ນ ຄຽງຄູ່ກັບການເຊື່ອມຕໍ່ ແລະ ການບໍລິການໂລຈິສຕິກຂອງລາວທີ່ດີຂຶ້ນ. ເຖິງຢ່າງໃດກໍຕາມ ເງິນກີບມີແນວໂນ້ມຈະຍັງຢູ່ພາຍໃຕ້ຄວາມກົດດັນ ຍ້ອນການນຳເຂົ້າສູງ ແລະ ຄວາມຕ້ອງການເງິນຕາຕ່າງປະເທດສູງ ເພື່ອຊຳລະໜີ້.

ແຫຼ່ງຂ່າວ: ວຽງຈັນທາມສ໌