ການຄົ້ນພົບທີ່ໜ້າຕື່ນເຕັ້ນ ເມື່ອຂຸດພົບພະພຸດທະຮູບຢູ່ບໍ່ແກ້ວ

ອຳນາດການປົກຄອງແຂວງບໍ່ແກ້ວ ກຳລັງສືບຕໍ່ຄົ້ນຫາພະພຸດທະຮູບ ຫຼັງຈາກຂຸດພົບຫຼາຍກວ່າ 30 ອົງ ໃນລະຫວ່າງການຂຸດຄົ້ນ ແຕ່ວັນທີ 16-18 ມີນາ.

ທ່ານ ດຣ ສົມຄິດ ວົງປັນຍາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງບໍ່ແກ້ວ ໃຫ້ສຳພາດກັບວຽງຈັນທາມສ໌ວ່າ ອາຍຸ ແລະ ທີ່ມາຂອງພະພຸດທະຮູບຍັງບໍ່ຈະແຈ້ງ ແຕ່ສ່ວນຫຼາຍເຮັດດ້ວຍທອງສຳລິດ ແລະ ບາງອົງມີການແກະສະຫຼັກຕົວອັກສອນ.

ເມື່ອການຂຸດຄົ້ນສຳເລັດ ພະພຸດທະຮູບຈະຖືກກວດສອບໂດຍຊ່ຽວຊານຈາກກົມມໍລະດົກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ໃນລະຫວ່າງນີ້ ພະພຸດທະຮູບໄດ້ຖືກນຳໄປເກັບຮັກສາໄວ້ທີ່ວັດທອງທິບພັດທະນາຣາມ ບ້ານຫ້ວຍຕົ້ນເຜິ້ງ ເມືອງຕົ້ນເຜິ້ງ ເຊິ່ງມີການເຝົ້າຍາມຢ່າງໃກ້ຊິດ.
ອຳນາດການປົກຄອງແຂວງ ໄດ້ຄົ້ນຫາວັດຖຸບູຮານທີ່ຝັງຢູ່ໃຕ້ດິນ ໃນທ້າຍອາທິດ ໃກ້ແມ່ນ້ຳຂອງ ບໍລິເວນໃກ້ດອນເຜິ້ງຄຳ ຫຼັງຈາກຫ້ອງວ່າການປົກຄອງແຂວງ ແລະ ທີມຊ່ຽວຊານຈາກກົມມໍລະດົກ ເຫັນວ່າເປັນຈຸດທີ່ມີຄວາມເປັນໄປໄດ້ສູງ.

ໃນວັນທີ 16 ມີນາ ໄດ້ພົບພະພຸດທະຮູບອົງໃຫຍ່ ສູງ 80 ຊັງຕີແມັດ, ກວ້າງບ່າ 56 ຊັງຕີແມັດ ແລະ ກວ້າງທັງໝົດ 88 ຊັງຕີແມັດ.

ໃນວັນທີ 17 ມີນາ ໄດ້ຂຸດພົບພະພຸດທະຮູບອີກ 8 ອົງ ແລະ ອີກ 23 ອົງໃນວັນທີ 18 ມີນາ.
ການຂຸດຄົ້ນດັ່ງກ່າວ ສືບເນື່ອງຈາກການຄົ້ນພົບເສດພະເສີຂອງພະພຸດທະຮູບ ແລະ ພະພຸດທະຮູບນ້ອຍທີ່ບໍ່ມີພະເສີຫຼາຍອົງ ໃນວັນທີ 11 ມີນາ ໃນຂະນະທີ່ຄົນງານກຳລັງສ້ອມແປງທາງໃກ້ວັດທອງທິບ. ພະເສີຂອງພະພຸດທະຮູບ ຖືກພົບໃນດິນຊາຍທີ່ບໍລິສັດກໍ່ສ້າງໃຊ້ໃນການປັບປຸງທາງ.

ແຂວງບໍ່ແກ້ວມີວັດເກົ່າແກ່ຫຼາຍແຫ່ງ ແລະ ເຄີຍເປັນທີ່ຕັ້ງຂອງເມືອງບູຮານຊື່ສຸວັນນະໂຄມຄຳ. ສິ່ງທີ່ຍັງເຫຼືອຢູ່ໃນປັດຈຸບັນ ມີພຽງພະພຸດທະຮູບສູງ 7 ແມັດ ເຊິ່ງເຄີຍຖືກລັກລອບເອົາຊັບສົມບັດທີ່ເຊື່ອງໄວ້ຂ້າງໃນມາແຕ່ດົນນານ.