ທ່ານ ເຈີນ ກວງປຽວ ໃຫ້ການຊ່ວຍເຫຼືອ ແລະ ດຶງດູດນັກລົງທຶນມາລາວ

ທ່ານ ເຈີນ ກວງປຽວ ປະທານສະພາບໍລິຫານ ບໍລິສັດ China Enterprise Development Fund Management (Beijing) Co., Ltd. ຜູ້ໄດ້ຮັບນາມມະຍົດແບບຢ່າງດ້ານສິນທຳ ແລະ ແຮງງານດີເດັ່ນຂອງຈີນ ຈະຊຸກຍູ້ການຊ່ວຍເຫຼືອເພື່ອພັດທະນາຊຸມຊົນ ແລະ ດຶງດູດຜູ້ປະກອບການຈີນ ມາລົງທຶນໃນເຂດເສດຖະກິດພິເສດໃນລາວ.

ທ່ານ ດຣ ສິນລະວົງ ຄຸດໄພທູນ ຈັບມືກັບ ທ່ານ ເຈີນ ກວງປຽວ ໃນລະຫວ່າງການພົບປະທີ່ນະຄອນຫຼວງວຽງຈັນ.

ໃນໂອກາດທີ່ທ່ານ ເຈີນ ກວງປຽວ ແລະ ຄະນະ ເດີນທາງມາດຳເນີນທຸລະກິດຢູ່ລາວ ທ່ານໄດ້ຖືໂອກາດເຂົ້າພົບ ທ່ານ ດຣ ສິນລະວົງ ຄຸດໄພທູນ ປະທານແນວລາວສ້າງຊາດ ເພື່ອລົງນາມບົດບັນທຶກການຮ່ວມມື.

ການຮ່ວມມືດັ່ງກ່າວ ແນໃສ່ເພີ່ມທະວີສາຍພົວພັນມິດຕະພາບລະຫວ່າງສອງພັກ, ສອງລັດ ແລະ ປະຊາຊົນລາວ-ຈີນ ແລະ ຜັນຂະຫຍາຍຖະແຫຼງການຮ່ວມຂອງການນຳສູງສຸດຂອງສອງປະເທດ ກ່ຽວກັບການສືບຕໍ່ສ້າງຄູ່ຮ່ວມຊາຕາກຳລາວ-ຈີນ.

ພ້ອມນັ້ນ ຍັງເປັນການສະໜັບສະໜູນການຈັດຕັ້ງປະຕິບັດບົດບັນທຶກການຮ່ວມມື ລະຫວ່າງຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ (SEZO) ກັບບໍລິສັດ ທີ່ລັດຖະບານໄດ້ອະນຸມັດໃນວັນທີ 8 ມິຖຸນາ 2023 ກ່ຽວກັບວຽກງານມະຫາຊົນ ຕາມພາລະບົດບາດຂອງແນວລາວສ້າງຊາດ.

ບົດບັນທຶກດັ່ງກ່າວ ກວມເອົາວຽກງານການກຸສົນສາທາລະນະ, ການສຶກສາ, ການສ້າງຊັບພະຍາກອນມະນຸດໃຫ້ແກ່ຜູ້ດ້ອຍໂອກາດ ເພື່ອສ້າງຄວາມສາມັກຄີ ແລະ ພັດທະນາຊຸມຊົນ, ທ້ອງຖິ່ນ, ສ້າງຊັບພະຍາກອນມະນຸດ ແລະ ເສີມຂະຫຍາຍວຽກງານຂອງແນວລາວສ້າງຊາດ.

ສຶກສາຄົ້ນຄວ້າການຝຶກອົບຮົມ ເພື່ອຍົກລະດັບສີມືແຮງງານຂອງປະຊາຊົນ ໃຫ້ຫຼຸດພົ້ນອອກຈາກຄວາມທຸກຍາກ ແລະ ສຶກສາຄວາມເປັນໄປໄດ້ໃນການສ້າງຕັ້ງມູນນິທິການກຸສົນບໍ່ສະແຫວງຫາຜົນກຳໄລ “ໜຶ່ງແລວທາງ ໜຶ່ງເສັ້ນທາງ”.
ບົດບັນທຶກຄວາມເຂົ້າໃຈສະບັບນີ້ ມີຜົນສັກສິດໜຶ່ງປີ ແລະ ຈະຕໍ່ອາຍຸ ຖ້າເຫັນວ່າການລິເລີ່ມນີ້ເກີດປະໂຫຍດ ແລະ ປະສົບຜົນສຳເລັດ.

ພາຍໃຕ້ການຮ່ວມມືນີ້ ບໍລິສັດ China Enterprise Development Fund Management (Beijing) Co., Ltd. ຈະສະໜອງອຸປະກອນໄອທີໃຫ້ແກ່ໂຮງຮຽນວິຊາຊີບ ເມືອງປາກງື່ມ, ນະຄອນຫຼວງວຽງຈັນ.

ລວມມີຄອມພິວເຕີຕັ້ງໂຕະ 25 ເຄື່ອງ ພ້ອມການເຊື່ອມຕໍ່ອິນເຕີເນັດ, ອຸປະກອນປະຊຸມທາງໄກ ແລະ ການຕິດຕັ້ງ ພ້ອມອຸປະກອນ IP 13 ໜ່ວຍ ໃຫ້ພະນັກງານຫ້ອງການແນວລາວສ້າງຊາດນຳໃຊ້ ມູນຄ່າ 1.2 ຕື້ກີບ.

ແຫຼ່ງຂ່າວ: ວຽງຈັນທາມສ໌