ວັງວຽງ ເປັນເມືອງຈຸດໝາຍປາຍທາງຂອງການທ່ຽວສຳຄັນຂອງລາວເຮົາ ເຊິ່ງແຕ່ລະປີມີນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນທາງມາພັກຜ່ອນທ່ອງທ່ຽວຊົມເມືອງແຫ່ງມົນສະເໜ່ນີ້ບໍ່ຂາດສາຍ.
ຫຼ້າສຸດນັບແຕ່ເດືອນມັງກອນ ເຖິງ ເດືອນຕຸລາ 2024 ມີນັກທ່ອງທ່ຽວເຂົ້າໄປທ່ຽວ ເມືອງວັງວຽງ ແຂວງວຽງຈັນແຫ່ງນີ້ ຫຼາຍເຖິງ 9 ແສນກວ່າຄົນ, ໃນນີ້ ເປັນນັກທ່ອງທ່ຽວຕ່າງປະເທດ 4 ແສນກວ່າຄົນ. ລື່ນແຜນການປີທີ່ວາງໄວ້ 8 ແສນຄົນ ເປັນທີ່ຮຽບຮ້ອຍແລ້ວ, ຄາດວ່າແຕ່ນີ້ໄປຈົນໝົດປີນີ້ ນັກທ່ອງທ່ຽວຈະມາເມືອງວັງວຽງ ເພີ່ມຂຶ້ນອີກຈໍານວນຫຼາຍ.

ທ່ານ ບຸນຈັນ ມາລາວົງ ເຈົ້າເມືອງວັງວຽງ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 21 ຕຸລາ 2024 ວ່າ: ການທ່ອງທ່ຽວຢູ່ເມືອງວັງວຽງ ມີທ່າອ່ຽງດີຂຶ້ນຢ່າງຕໍ່ເນື່ອງ ມີນັກທ່ອງທ່ຽວທັງພາຍໃນ ແລະ ຕ່າງປະເທດເດີນທາງເຂົ້າໄປທ່ອງທ່ຽວພາຍໃນເມືອງຢ່າງຫຼວງຫຼາຍ, ສະເພາະປີນີ້ແມ່ນເພີ່ມຂຶ້ນກວ່າທຸກປີຜ່ານມາ. ທັ້ງນີ້, ກໍຍ້ອນການເດີນທາງໄປເມືອງວັງວຽງ ມີຄວາມສະດວກສະບາຍ, ທັງທາງລົດໄຟ ແລະ ທາງດ່ວນ. ນອກຈາກນີ້ບັນດາສະຖານທີ່ທ່ອງທ່ຽວ ແລະ ກິດຈະກໍາທ່ອງທ່ຽວພາຍໃນເມືອງ ໄດ້ຮັບການປັບປຸງດີຂຶ້ນກວ່າເກົ່າ.

ທ່ານໃຫ້ຮູ້ຕື່ມວ່າ: ປັດຈຸບັນເມືອງວັງວຽງ ໄດ້ພັດທະນາຫຼາຍຢ່າງທີ່ຕິດພັນກັບວຽກງານການທ່ອງທ່ຽວ ໂດຍສະເພາະການປັບປຸງພື້ນຖານໂຄງລ່າງ ເຊິ່ງທະນາຄານພັດທະນາອາຊີ ຫຼື ADB ໃຫ້ທຶນສະໜັບສະໜູນ ຈໍານວນ 3 ສັນຍາ ມູນຄ່າເກືອບ 15 ລ້ານໂດລາສະຫະລັດ, ໃນນີ້ ໄດ້ຈັດຕັ້ງປະຕິບັດໄປແລ້ວ 2 ສັນຍາ ຄື: ສັນຍາໂຄງການກໍ່ສ້າງສະໜາມຂີ້ເຫຍື້ອ ແລະ ສັນຍາໂຄງການກໍ່ສ້າງຂົວຂ້າມນໍ້າຊອງ ແລະ ທາງເບຕົງວົງແຫວນໄປຫາແກ້ງຍຸຍ ເຊິ່ງຢູ່ໃນໄລຍະກະກຽມມອບ – ຮັບຜົນສໍາເລັດໂຄງການໃນໄວໆນີ້.

ສ່ວນສັນຍາທີ 3 ຫາກໍເຊັນສັນຍາກັນ ໃນວັນທີ 17 ຕຸລາ 2024 ຄື: ໂຄງການປັບປຸງເສັ້ນທາງເທສະບານຄືນໃໝ່ພາຍໃນຕົວເມືອງວັງວຽງ ໂດຍຈະໄດ້ປັບປຸງເສັ້ນທາງພາຍໃນເທສະບານເມືອງ 11 ເສັ້ນ ຄວາມຍາວປະມານ 5.294 ແມັດ, ຈະເລີ່ມລົງມືກໍ່ສ້າງໃນວັນທີ 1 ພະຈິກ 2024 ແລະ ຄາດວ່າຈະໃຫ້ສຳເລັດໃນວັນທີ 31 ມັງກອນ 2026 ໃຊ້ເວລາໃນການກໍ່ສ້າງທັງໝົດ 15 ເດືອນ.